carelink ministries

Turkmeni Bible Literature

9.3 Biziň hem-de Özi üçin getirilen gurbanlyk

Ýewreý baş ruhanysy ilki bilen öz gänäleri üçin, soňra bolsa, beýleki adamlaryň günäleri üçin gurbanlyk getirmeli bolupdy (Ýewreýler 5:1-3). Mesihiň gurbanlygynda hem edil şunuň ýaly ikitaraply ugur bolupdyr. Mesihiň özünde asla hiç hili günä bolmasa-da, Onuň tebigatynyň ynsan bolandygy zerarly ölümden gutulmaga mätäç bolupdyr. Hudaý Mesihiň Öz-Özüni gurban getirendigini göz öňünde tutup, Oňa halas bolmagy peşgeş berdi. Şeýlelikde, Isa özüniň halas bolmagy hem-de bizde hem halas bolmak mümkinçiliginiň bolmagy üçin gurban boldy. Hoş Habarda bu barada köp gezek aýdylýar.

Aşakda Mesihiň gurbanlygynyň Özi hem-de biziň üçin getirendigini subut edýän aýatlaryň sanawy getirilýär. Bu soraga bu ýerde köp üns berilýär. Çünki men bu temanyň Rebbimiziň ynsanlygyna dogry düşünmeklik üçin uly ähmiýetiniň bardygyny hasaplaýaryn. Mümkin siz bu kitaby okap gutaranyňyzdan soň geljekde bu soragy has çuň öwrenesiňiz geler. Şonda Size aşakda aýdyljaklaryň ählisi gerek bolar.

• Baş Ruhany „...halk üçin bolşy ýaly, öz günäleri üçin hem gurban bermäge borçludyr...şonuň ýaly Mesih“ bu babatda Musanyň baş ruhanylyk işini berjaý etdi (Ýewreýler 5:3,5). Bu ýerde „borçludyr“ diýlen söz grek dilinde aýratyn-da maliýe borçy bolmaklygy aňladýandyr – biziň Rebbimiz babatda bolsa, bu Özüňe we şeýle hem bize gutulşy satyn almak diýmekligi aňladypdyr. Mesih muny Özüniň ynsan tebigatly bolandygy zerarly etmeli bolupdy (Ýewreýler 5:3). Bu Onuň özünde şahsy günäleriň bolandygyny we mundan saplanmak üçin töleg tölemelidigini aňladýan däldir. Emma bu pursaty juda göni bellemeli däldir. Biz Onuň gurbanlyk gany bilen gutulandyrys. Edil şunuň ýaly-da, Ol Özi üçin hem muny berjaý edendir.

• Mesih „beýleki ruhanylar ýaly, her gün öňürti öz günäleri, soňra-da halkyň günäleri üçin gurban hödürlemäge mejbur däl. Çünki Ol Özüni hödürlemek bilen, muny bir gezekde bitirdi“ (Ýewreýler 7:27). Ruhanylaryň iki görnüşli gurban getirmeleriniň hem-de Mesihiň gurban getirmesiniň arasyndaky gabat gelmeleri Pawlusyň nygtaýandygyna hiç hili şübhe ýokdur. Ol muny ýene-de Ýewreýlere 9:7 hatda nygtaýar ( 12, 25 aýatlary deňeşdir). Munuň tapawudy Mesihiň muny diňe bir gezek, baş ruhanynyň bolsa, muny her ýyl berjaý edendiginden ybaratdyr. Eger-de tapawut Mesihiň Özüni diňe halk üçin gurban edendiginde bolan bolsa, onda by nygtalyp geçilerdi. Emma aýdylyşy ýaly, Meshiň gurbanlygy halkyň günäsinden aýry bolan Öz şahsy „günäsi“ üçin getirilendir – Onuň „günäsi“ biziň günälerimiz bolan däldir. Isada birkemsiz, bigünä häsiýetiniň bolandygyny bilmek bilen, „günä“ sözi bu ýerde ynsan aslyýetiniň günä mahsus bolan häsiýetini beýan etmäge ýene-de bir mysaldyr. Metonimiýa boýunça, sebäp (günäli aslyýet) hakda dowamly yzysüre hökmünde aýdylýandyr. Biziň Rebbimiziň birkemsiz bolandygyny hem-de Onuň günäde aýyplanyp bilinmeýändigi ýene-de nygtamalydyr.

• Hudaý „Goýunlaryň uly Çopany bolan Rebbimiz Isany (Mesihi) ebedi ähtiň gany bilen ölümden direltdi“ (Ýewreýler 13:20), ýagny Reb biziň çopanymyz bolupdy. Ol şeýle hem goýunlary öldüripdir we şeýdip özüni ölüme eltdi. Onuň gany arkaly Hudaý Ony ýokara göterdi. Şeýlelikde, Mesih hem gurbanlyk bolupdyr hem-de ruhany bolupdyr.

• Zekerýa pygamberiň kitabynda (9:9) şeýle aýdylypdyr: „Patyşaň seniň (Isa) ýanyňa dogruçyl we gutuldyrýan bolup geler“. Bibliýanyň iňlis dilindäki terjimesinde terjimäniň başga mümkin bolan usulyna salgylanylýar: „gutuldyrýan“ sözüne derek „Özüni gutuldyrýan“ sözuň ulanylmagy. Bibliýanyň AV neşirinde bolsa, „gutuldyrmasy bar bolan“ diýilmegidir. Bu dürli okalyşlar Rebbimiziň Özüni gutuldyrmagy bilen, bize-de gutulşy getirendigini çaklamaga esas berýär. Haçdaky gurban arkaly Isa Özüniň şahsy aslyýetini gutardy hem-de şeýtmek bilen, Ol biziň gutulmagymyzy gazanmagy başardy. Bizi gutarmak baradaky kontekstiň çäginden daşda Onuň ölümi hakda oýlanmak ýerlikli däldir.

• Kanun boýunça mallaryň gurban getirilmegi arkaly gan dökülme babatdaky ähli salgylanmalaryň Mesihiň gurban getirmesine dahylnyň bardygy barada oýlanmaklyk zerurdyr. Altar (gurban ýakylýan ýer) Mesihiň simwoly bolup, ýylda bir gezek gan bilen tämizlenipdir (Çykyş 30:10). Bu Mesihiň Özüni Öz gany bilen mukaddeslendirjekdigini görkezipdir. Hakykatdan hem Mesihi aňladýan bütin çadyr gan bilen ýuwulmaly bolupdyr (Ýewreýler 9:23). Çadyryň göze ilýän goşlary günä golaý bolmagy bilen, tämizlenmek talap edilse-de, olar hiç hili günä etmändi. Biziň Rebbimiz bilen hem edil şeýle boldy. Baş Ruhany özüniň gullugynyň başynda özüne gan sepeläp çykmaly bolşy ýaly, Mesih-de Özüniň Göklerde biz üçin gullugyna başlamazdan öňürti Özüni gurban etmeli bolupdyr (Lewit 8:23).

Isanyň Öz-Özüni gutarandygy Onuň hem günäli bolandygyny aňladýan däldir. Şahsy günäli gurbanlygy getirmeklik gurbanlyk getirýäniň günälidigini hemişe aňladýan däldir.